Cúlra
Tionscadal é Fios Físe atá bunaithe ag Ollscoil na hÉireann Gaillimh mar thoradh ar phróiseas comhairliúcháin le TG4 agus le RTÉ. Bunaíodh an tionscadal le tomhais a dhéanamh ar an tóir agus ar an éileamh atá ag Pobal Labhartha na Gaeilge ar TG4 agus ar RTÉ Raidió na Gaeltachta.
Faigheann TG4 staidrimh féachana seachtainiúla ó TAM Ireland Nielsen agus faigheann RTÉ staidrimh rialta ón JNLR maidir le Raidió na Gaeltachta. Baineann na staidrimh sin le pobal féachana agus éisteachta na gcraoltóirí in Éirinn trí chéile. Tá sé mar aidhm ar leith leis an togra seo faisnéis agus tuairimí a bhailiú maidir le pátrúin féachana agus éisteachta phobal labhartha na Gaeilge ar fud na hÉireann, thuaidh agus theas.
Tá an Painéal oscailte do phobal labhartha na Gaeilge ó cheann ceann na tíre mar sin. Tógfaidh comhdhéanamh an Phainéal scaipeadh thíreolaíoch, próifíl déimeagrafach agus inniúlacht teanga san áireamh.
Luach an Aiseolais
Déanfaidh foireann an tionscadail scagadh rialta ar na sonraí a eascróidh óna dialanna féachana. Mar aon le léargas a fháil ar éileamh Phobal Labhartha na Gaeilge ar TG4 agus ar RTÉ Raidió na Gaeltachta beidh fiúntas ag baint leis na staidrimh a eascróidh ón tionscadal maidir le cinntí sceidealaithe agus coimisiúnaithe.
Ceisteanna Coitianta
Cén uair a bheidh an Dialann Féachana agus Éisteachta (suirbhé beag) le líonadh agam?
Scaiptear an Dialann uair sa tseachtain, timpeall meán lae gach Luan de ghnáth.
Cén chaoi a mbeidh fáil agam ar an Dialann?
Sa ríomhphost a seoltar chuig na baill gach Luan bíonn nasc chuig an Dialann. Cliceáil an nasc agus osclóidh an Dialann i mbrabhsálaí (mar shampla Internet Explorer, Mozilla Firefox, Chrome nó cibé ceann atá agat). Líonfaidh tú an Dialann ansin. Is féidir é seo a dhéanamh ar ríomhaire nó ar fhón póca nó ar iPad agus araile.
Cé mhéad ama a thógann sé an Dialann a líonadh gach seachtain?
Tógann sé cúpla nóiméad ar an meán an Dialann a líonadh.
An mbeidh orm an Dialann a líonadh gach seachtain?
Ní gá an Dialann a líonadh gach seachtain ach má líonann na baill an Dialann go rialta cabhraíonn sé go mór le caighdeán an aiseolais agus le rath an tionscadail. Sa chás nach raibh tú ag breathnú ar TG4 agus/nó nach raibh tú ag éisteacht le RTÉ Raidió na Gaeltachta níl le déanamh ach an chéad cheist sa dá dhialann a fhreagairt:
Ar fhéach tú ar TG4 an tseachtain seo? D'fhéach/Níor fhéach
Ar éist tú le RTÉ Raidió na Gaeltachta an tseachtain seo?
D'éist/Níor éist.
Cén cineál ceisteanna a bhíonn sa Dialann?
Ceisteanna ilrogha formhór na gceisteanna atá sa Dialann. Bíonn na ceisteanna dírithe ar sceidil na gcraoltóirí. Freagraítear na ceisteanna seo trí tic a chur le hais do rogha freagra.
An mbeidh orm féachaint ar TG4 agus éisteacht le RTÉ Raidió na Gaeltachta níos minice de bharr mé a bheith páirteach i Fios Físe?
Ní hí an aidhm atá ag Fios Físe go mbreathnóidh baill an Phainéil ar TG4 níos minice ná go n-éisteoidh na baill le RTÉ Raidió na Gaeltachta níos minice de bharr gur baill iad den tionscadal. Is í an phríomhaidhm atá ag Fios Físe ná léargas beacht a fháil ar ghnáthphatrúin fhéachana agus éisteachta Phobal Labhartha na Gaeilge.
Ní bhreathnaím ach ar fhíorbheagán teilifíse agus ní éistím ach le fíorbheagán raidió, mar sin, an fiú dom a bheith páirteach i Fios Físe?
Is fiú a bheith páirteach go cinnte. Mar a luadh thuas tá sé mar aidhm ag Fios Físe léargas a fháil ar na pátrúin fhéachana agus éisteachta nádúrtha atá ag Pobal Labhartha na Gaeilge trí chéile. Dá réir sin tá sé tábhachtach go mbeadh meascán maith de bhaill le pátrúin fhéachana agus éisteachta éagsúla páirteach.
Cén fhad a gcaithfidh ball fanacht ar an bPainéal Lucht Féachana agus Éisteachta?
Níl aon tréimhse ar leith ann a gcaithfidh ball fanacht ar Phainéal Fios Físe. Is féidir le ball imeacht den Phainéal aon uair is mian leis/léi trí theachtaireacht a sheoladh chuig eolas@fiosfise.ie Nuair a imíonn ball den Phainéal baintear a gcuid sonraí uile den chóras.
Céard atá i gceist le Scéim Dílseachta na mball?
Reáchtálann Fios Físe Crannchur gach mí do na baill a líonann na Dialanna go rialta. Bíonn deis ag na baill sin ceann de 6 Dhearbhán One4all ar luach €100/€500 a bhuachan.
Cén úsáid a bhaintear as aiseolas agus tuairimí na mball faoi sceidil TG4 agus RTÉ Raidió na Gaeltachta?
Tá an t-aiseolas an-luachmhar don dá chraoltóir le léargas a thabhairt dóibh ar thuairimí phobal labhartha na Gaeilge faoi na sceidil agus gheobhaidh na craoltóirí tuiscint ar bhealaí le freastal níos fearr a dhéanamh ar an spriocphobal sin.
